Ukraina va Finlyandiya mudofaa sohasida yangi kelishuv imzoladi
Finlyandiya Ukrainaga mudofaa sohasida yordam berish majburiyatini oldi.
Ukraina va Finlyandiya o‘rtasida mudofaa sohasidagi hamkorlikni chuqurlashtirish maqsadida yangi kelishuv imzolandi. Memorandumga Finlyandiya mudofaa vaziri Antti Hyakkyanen va Ukrainaning mudofaa vaziri Rustem Umerov tomonidan imzo chekildi.
Finlyandiya Mudofaa vazirligi tomonidan e’lon qilingan bayonotga ko‘ra, memorandum doirasida:
- Mudofaa sanoati va harbiy texnika sohasidagi hamkorlik kuchaytiriladi
- Axborot almashinuvi va harbiy tadqiqotlar bo‘yicha tajriba almashiladi
- Harbiy innovatsiyalar va o‘q-dorilar ishlab chiqarish sohasi rivojlantiriladi
- Finlyandiya va Ukrainadagi mudofaa loyihalarida o‘zaro hamkorlik qilinadi
Kelishuvning maqsadi har ikki davlatning mudofaa salohiyatini oshirish va o‘zaro strategik sheriklikni mustahkamlashdir.
Mazkur memorandum Finlyandiyaning Ukrainaga ko‘rsatayotgan harbiy yordamining navbatdagi bosqichi bo‘lib, rasmiy Helsinkining Kiyev bilan mudofaa sohasidagi hamkorlikni yanada mustahkamlash istagini bildiradi. Shu bilan birga, Finlyandiya Ukraina bilan uzoq muddatli hamkorlik qilish va harbiy-texnik qo‘llab-quvvatlashni davom ettirishga tayyorligini tasdiqlagan.
