Shimoliy Koreyada uch kishi qatl qilindi
Ular mamlakatdan qochishga uringanlikda ayblangan.
Shimoliy Koreyaning uch fuqarosi mamlakatdan qochishga uringani uchun omma oldida qatl etildi. Mahalliy aholi, jumladan, bolalar ham ushbu dahshatli manzaraga guvoh bo‘lishga majbur qilingan. Bu voqea Shimoliy Koreyaning qattiq nazorat ostidagi rejimidan qochishga uringanlarga nisbatan shafqatsiz munosabatini yana bir bor ko‘rsatmoqda.
Mahalliy manbalarga ko‘ra, Kim ismli ikki aka-uka va ularning do‘sti Ri Janubiy Koreyaga qochishni rejalashtirgan. Ular bir necha oy davomida tayyorgarlik ko‘rib, kichik qayiq sotib olishgan va 6 yanvar kuni qalin tuman ichida suzib ketishga harakat qilishgan. Biroq, Shimoliy Koreya xavfsizlik kuchlari ularning rejasini fosh qilib, qo‘lga olishgan.
Uch kishiga nisbatan davlatga xiyonat aybi qo‘yilgan va ularning qishloq ahli oldida otib o‘ldirilgani aytilmoqda. Shimoliy Koreya hukumati o‘z fuqarolarining mamlakatdan qochishini oldini olish uchun shafqatsiz choralar ko‘rishda davom etmoqda.
