AQShda kuchli bo'ron va tornado kuzatildi
Oqibatda 16 kishi halok bo'lgan.
AQShning O‘rta G‘arbiy va janubiy hududlarida kuchli bo‘ron va tornadolar sodir bo‘lib, kamida 16 kishining hayotiga zomin bo‘ldi. NBC News telekanalining xabar berishicha, tabiiy ofat eng ko‘p talafot yetkazgan shtatlar Missuri, Arkanzas va Texas bo‘lib, u yerda qurbonlar va jarohatlanganlar soni ortib borayotgani aytilmoqda.
Dastlabki ma’lumotlarga ko‘ra, Missurida 10 kishi, Arkanzas va Texasda esa 3 nafardan odam halok bo‘lgan. Arkanzasning sakkiz grafligida 29 kishi jarohatlangan, Missurida esa 316 mingdan ortiq mijoz elektr ta’minotisiz qolgan. Tabiiy ofat yo‘llarni to‘sib qo‘ygan, uylar va infratuzilmalarga jiddiy zarar yetgan.
Rasmiylar boshqa shtatlarda ham tornado xavfi yuqori ekanini bildirdi. Milliy ob-havo xizmati aholiga hushyorlikni oshirish va xavfsizlik choralarini ko‘rishni tavsiya qildi. Qutqaruv xizmatlari vayronalar ostida qolganlarni qidirish ishlarini davom ettirmoqda.
Mutaxassislarning fikricha, bu yil AQShda tornadolar mavsumi odatdagidan tez boshlanib, tabiiy ofatlar soni va kuchi oshishi mumkin. Ayni paytda favqulodda vaziyat xizmati aholiga yordam berish uchun qo‘shimcha resurslarni safarbar qilmoqda.
