Oliy maʼlumotli odamlar sekinroq qarishi aniqlandi
Olimlar bu bo‘yicha yangi tadqiqot o‘tkazishdi.
London universitet kolleji olimlari o‘tkazgan tadqiqot natijalariga ko‘ra, yuqori ijtimoiy-iqtisodiy maqomga ega bo‘lgan odamlar, jumladan, oliy maʼlumotli va yuqori daromadli shaxslar, tengdoshlariga nisbatan sekinroq qariydi va yoshga bog‘liq kasalliklarga kamroq duchor bo‘ladi.
Tadqiqot doirasida 800 000 dan ortiq ishtirokchi qatnashgan to‘rtta yirik loyiha natijalari tahlil qilindi. Qarish jarayoni yoshga bog‘liq kasalliklar va qon plazmasidagi oqsillar tarkibi orqali baholandi.
Asosiy natijalar: Past ijtimoiy maqomga ega bo‘lgan odamlar yuqori maqomdagilarga nisbatan 20 foiz ko‘proq yosh bilan bog‘liq kasalliklarga chalinadi. Ular 20 yil o‘tgach yuqori maqomdagi guruh bilan bir xil miqdorda qarish bilan bog‘liq tashxislarga ega bo‘lgan – yaʼni tezroq qarish kuzatilgan. Kam taʼminlangan odamlarda 2-toifa diabet, yurak-qon tomir kasalliklari, jigar kasalliklari, o‘pka saratoni va insult xavfi ikki baravar yuqori. Qondagi 14 ta oqsil darajasi bevosita insonning ijtimoiy mavqeyiga bog‘liq bo‘lib, yuqori ijtimoiy mavqe kasallik xavfini 39 foizgacha kamaytirishi mumkin.
Shuningdek, tadqiqotchilar yoshga qarab ijtimoiy mavqeni yaxshilash qarish jarayonini ijobiy yo‘nalishda o‘zgartirishi mumkinligini aniqladilar. Bolaligida qiyin sharoitda yashagan, lekin keyinchalik yuqori daromad va maqomga erishgan odamlarda yoshga bog‘liq kasalliklar kamroq uchraydi.
Professor Linda Partridge bu jarayon turmush tarzi, stress darajasi, ruhiy salomatlik, atrof-muhit ifloslanishi, oziqlanish, jismoniy faollik, chekish va spirtli ichimliklarni isteʼmol qilish bilan bog‘liq bo‘lishi mumkinligini taʼkidladi. Shuningdek, tibbiy xizmatlardan foydalanish imkoniyati, jumladan, profilaktik tekshiruvlar va emlashlar, salomatlik holatiga taʼsir qiluvchi muhim omillardan biri hisoblanadi.
