Rossiyada kuniga 170 ga yaqin zilzila qayd etildi
Bunga Bezymyanniy vulqonining faollashuvi sabab bo'lmoqda.
Rossiyaning Kamchatka mintaqasida joylashgan Bezymyanniy vulqonida kuniga 170 ga yaqin seysmik hodisalar qayd etilmoqda. Rossiya Fanlar Akademiyasi Geofizika xizmati Kamchatka filiali tomonidan berilgan ma’lumotlarga ko‘ra, bu zilzilalar vulqon gumbazining kuchli porlashi va doimiy issiq bo‘lakli ko‘chkilar bilan birga kelmoqda.
Mutaxassislarning xabar berishicha, kechasi gumbazning yorqin porlashi aniq ko‘zga tashlanadi, shuningdek, vulqonning janubi-sharqiy yonbag‘rida issiq bo'laklarning muntazam ravishda sirg‘alib tushishi kuzatilmoqda. Bundan tashqari, vulqondan havoga ko‘tarilgan kul ustuni 3 kilometr balandlikka yetgan. Ushbu vaziyat tufayli aviatsiya xavfsizligi uchun apelsin kodi e’lon qilindi, bu esa havodagi transport vositalari uchun jiddiy xavf borligini bildiradi.
Bezymyanniy vulqoni Kamchatkaning Ust-Kamchatka tumani hududida, Klyuchi posyolkasidan 40 kilometr uzoqlikda joylashgan. Uning balandligi taxminan 3 ming metrni tashkil etadi. So‘nggi marta vulqon 2024-yilning iyul oyida otilgan edi.
Mutaxassislar vulqonning yanada faollashishi ehtimolini istisno etmayapti va hududda yashovchi aholiga hushyor bo‘lishni tavsiya qilmoqda.
