Tadqiqot: ChatGPT 67 foiz noto‘g‘ri maʼlumot beradi

Kolumbiya universiteti qoshidagi Raqamli jurnalistika bo‘yicha Tov markazi tadqiqotchilari AI qidiruv tizimlarining ishonchliligi bo‘yicha tadqiqot o‘tkazdi. Ularning xulosalariga ko‘ra, sunʼiy intellekt asosida ishlovchi qidiruv tizimlari yangiliklar manbalari bo‘yicha so‘rovlarning 60 foizdan ko‘prog‘iga noto‘g‘ri javob beradi.

 

AI vositalari orasida ChatGPT Search 67 foiz holatda noto‘g‘ri javob bergan. Bu 200 ta sinov so‘rovining 134 tasi xato bo‘lganini anglatadi. Eng yuqori xatolik darajasi esa Grok 3 platformasida qayd etilgan – bu tizimning javoblari 94 foiz noto‘g‘ri bo‘lib chiqdi. Tadqiqotchilar AI modellarining ishonchli maʼlumot topilmaganda sukut saqlash o‘rniga, ishonchli ko‘ringan, ammo noto‘g‘ri javoblarni yaratishini aniqladi.

 

Shuningdek, tadqiqot shuni ko‘rsatdiki, pullik xizmatlar har doim ham aniq natija bermaydi. Perplexity Pro ($20/oy) va Grok 3 premium versiyasi ($40/oy) tekin variantlardan ham ko‘proq xato javoblar qaytarishi mumkin.

 

Boshqa muammo soxta URL manzillar yaratish bilan bog‘liq. Google Gemini va Grok 3 tizimlari tomonidan taqdim etilgan havolalarning yarmidan ko‘pi mavjud bo‘lmagan yoki buzilgan sahifalarga olib kirgan. Ayniqsa, 200 ta Grok 3 havolasining 154 tasi ishlamagan. Bu esa foydalanuvchilarga noto‘g‘ri yoki chalg‘ituvchi maʼlumot yetkazilishiga sabab bo‘lmoqda.