Samarqandda maktab direktori o‘quvchini kaltakladi
Bunga o'qituvchi va o'quvchi o'rtasidagi janjal sabab bo'lgan.
Samarqand viloyati Narpay tumanidagi 50-umumta’lim maktabi direktori o‘quvchini kaltaklagani aks etgan video ijtimoiy tarmoqlarda tarqaldi. Holat bo‘yicha Samarqand viloyati Maktabgacha va maktab ta’limi boshqarmasi rasmiy izoh berdi.
Ma’lum bo‘lishicha, 2025-yil 17-mart kuni 8-"A" sinf o‘quvchisi Sh.I. biologiya darsida sinfdoshi bilan gaplashib, tartibga rioya qilmagani sababli o‘qituvchi K.O. tomonidan unga tanbeh berilgan. Biroq o‘quvchi bundan xulosa chiqarmay, o‘qituvchini haqorat qilgan va natijada o‘qituvchi bilan o‘quvchi o‘rtasida janjal yuzaga kelgan.
Bu holatni boshqa o‘quvchilardan biri maktab direktoriga yetkazgan. Direktor sinfxonaga kirganida Sh.I. o‘qituvchi K.O.ning yoqasidan ushlab turganini ko‘rib, ularni ajratishga harakat qilgan va jahl ustida o‘quvchining yuziga tarsaki tushirgan. Bu haqda direktor o‘z tushuntirish xatida yozgan.
Hozirda holat huquqni muhofaza qiluvchi organlar tomonidan o‘rganilmoqda.
