AQSH Eron neftiga qarshi yangi sanksiyalar joriy qildi
Tramp Tehrondan muzokaralar o‘tkazishni talab qilmoqda.
Sanksiyalar ro‘yxatiga “soya flotiga” tegishli bir nechta tankerlar va yuz millionlab dollarga Eron neftini sotib olgan kichik Xitoy neftni qayta ishlash zavodi kiritildi.
Tramp Tehrondan yadroviy va raketa dasturlarini qisqartirish bo‘yicha muzokaralar o‘tkazishni talab qilmoqda va yaqinda Eron oliy rahbari Oyatulloh Ali Xomanaiyga bu haqda maktub yozib, rad etilgan taqdirda harbiy kuch qo‘llash bilan tahdid qildi. Hozircha Oyatulloh bu maktubga javob bermadi.
Bu orada Tramp Yaqin Sharqdagi Eron “qarshilik o‘qi”ning eng jangovar bo‘g‘ini — Yamandagi husiylarga tegishli obektlarni bombardimon qilishni buyurdi.
