AQSH Eron va Xitoyga nisbatan bosimni kuchaytirdi
AQSh Eron neftini sotib olgani uchun Xitoy kompaniyalariga sanksiya joriy qildi.
AQSh hukumati Xitoyning ikki neft-kimyo kompaniyasiga sanksiya joriy qildi. Vashington ularni Eron neftini import qilgani va AQShning mavjud sanksiyalarini chetlab o‘tgani uchun jazoladi.
AQSh Davlat departamenti ma’lumotiga ko‘ra, Huaying Huizhou Daya Bay terminali sanksiyalar ostidagi kemalardan Eron neftini qabul qilib, Xitoyga yetkazgan. Luqing Petrochemical esa Eron va hutiylar bilan bog‘liq kemalar orqali neft sotib olgani uchun cheklovga uchradi.
AQSh Moliya vaziri Skott Bessent bu harakatlarni Eronni moliyaviy jihatdan zaiflashtirishga qaratilgan qadam sifatida izohladi. Uning ta’kidlashicha, Eron neftidan tushadigan daromad terrorizmni moliyalashtirish va yadroviy dasturini rivojlantirish uchun ishlatilmoqda.
Shu oyda AQSh prezidenti Donald Tramp Eron oliy rahbariga yadroviy kelishuv bo‘yicha muzokaralar olib borishni taklif qilgan edi. Biroq Tehron hali bu taklifga javob bermadi. Vashington Eron neftini Xitoyga yetkazib beruvchi kompaniyalarga sanksiyalarni kengaytirib, Tehronni muzokaralar stoliga o‘tirishga majburlashga urinmoqda.
AQSh Moliya vazirligi yana 19 ta kompaniya va bir nechta Xitoy hamda Gonkongda joylashgan kemalar egalariga qarshi yangi sanksiyalar joriy qilganini ham e’lon qildi.
