Londonning eng yirik aeroporti vaqtincha yopildi
Bunga elektr uzilishi sabab yuzaga kelgan yong'in sabab bo'lgan.
Londondagi Xitrou aeroporti elektr podstansiyasida sodir bo‘lgan yong‘in oqibatida vaqtincha yopildi. Hodisa natijasida butun aeroport infratuzilmasi ishdan chiqdi, reyslar noma’lum muddatga kechiktirildi.
Aeroport ma’muriyatining xabar berishicha, elektr ta’minoti uzilishlari sababli yo‘lovchilar va xodimlarning xavfsizligini ta’minlash maqsadida Xitrou 21-mart soat 23:59 gacha yopilgan. Shuningdek, yaqin kunlarda ham parvozlar jadvalida jiddiy uzilishlar kuzatilishi mumkin.
Ma'lumotlarga ko‘ra, hozircha kelayotgan reyslar qayerga yo‘naltirilishi aniq emas. Yo‘lovchilarga aeroport qayta ochilguncha unga kelmaslik tavsiya qilingan.
Yong‘in Xeys hududida yuz bergan portlashdan so‘ng boshlangan bo‘lib, voqea joyida kuchli alangalar yuzaga kelgan. Mahalliy hukumat xavfsizlik choralari doirasida aholi va yaqin atrofdagi korxonalar ishchilarini evakuatsiya qilishga qaror qilgan.
Hodisa oqibatida 16 mingga yaqin odam elektr ta’minotisiz qolgan.
