Portugaliyada kuchli bo‘ron kuzatilmoqda
Bo‘ron oqibatida avtomagistrallar vaqtincha yopilgan.
Portugaliya bo‘ylab kechayotgan kuchli “Martinyo” bo‘roni yirik talafotlarga sabab bo‘ldi. Shamol daraxtlar va elektr ustunlarini qulatdi, tomlarni yulib tashladi, transport harakati izdan chiqdi. Rasmiylar moddiy zarar katta ekanini bildirgan, biroq aniq baholash hali amalga oshirilmagan.
Fuqaro muhofazasi xizmati 20-mart kuni yarim tundan soat 11:00 gacha 6000 ga yaqin hodisani qayd etdi, ularning aksariyati Lissabon va uning atrofida sodir bo‘lgan. Dastlabki ma’lumotlarga ko‘ra, olti kishi yengil tan jarohati olgan, 22 ta avtomagistral yopilgan, shuningdek, Tagus daryosi ustidagi osma ko‘prik harakat uchun to‘xtatilgan.
Bo‘ron Koimbra tumanidagi stadion tribunalarini qisman qulatdi, Kaskais aerodromida esa bir nechta kichik samolyotlarni ag‘darib yubordi. Madeyra arxipelagida ham 50 dan ortiq favqulodda hodisa qayd etilgan.
Ob-havo sharoiti shanbagacha yomonlashishi kutilmoqda, suv toshqinlari xavfi mavjud. “Martinyo” bo‘roni Ispaniyaga ham ta’sir qilgan, Fransiyaning janubiy hududlarida esa “to‘q sariq” ogohlantirish e’lon qilingan.
