Tramp Ta’lim vazirligini yopish farmoni sabab sudga berildi
Uning yangi farmoni Konstitutsiyaga zid deb topildi.
AQSh prezidenti Donald Trampning Ta’lim vazirligini yopish bo‘yicha farmoni sudga tortildi. O‘qituvchilar kasaba uyushmalari, inson huquqlari faollari va NAACP (rangli aholining rivojlanishiga ko‘maklashish milliy assotsiatsiyasi) Tramp ma’muriyatiga qarshi da’vo kiritdi.
Tramp 20-mart kuni imzolagan farmonga ko‘ra, Ta’lim vazirligi tugatilishi va uning vakolatlari shtatlarga o‘tkazilishi kerak. Prezidentning ta’kidlashicha, federal byudjetdan har yili 60 milliard dollar maktab ta’limi uchun ajratiladi, lekin natijalar past. Hujjatga ko‘ra, 8-sinf o‘quvchilarining 70 foizi o‘qish, 72 foizi esa matematikani tushunishda qiyinchiliklarga duch kelmoqda.
Bundan tashqari, Ta’lim vazirligi 1,6 trillion dollarlik talabalar kreditlarini boshqaradi, bu esa AQShning eng yirik banklaridan biri – Wells Fargo bilan tenglashadi. Tramp bu funksiyani xususiy sektor vakillariga topshirish kerakligini ta’kidlagan.
Sudga kiritilgan da’voda farmon Konstitutsiyaga va Kongress direktivalariga zid deb ko‘rsatilgan. Kongress Ta’lim vazirligiga ta’lim imkoniyatlarini rivojlantirish majburiyatini yuklagan, shu sababli uni tugatish qonunga muvofiq emas.
Ma’lumotlarga ko‘ra, vazirlik Trampning bu tahdidlari ortidan xodimlarini deyarli yarmiga qisqartirishga qaror qilgan. Hozirda u yerda 4,4 mingga yaqin kishi ishlaydi. Vazirlikni to‘liq yopish uchun esa Kongressning roziligi talab etiladi.
