Boliviyada kuchli suv toshqinlari sabab favqulodda holat e’lon qilindi
Bu so'ngi 40 yildagi eng kuchli yomg‘ingarchilik hisoblanadi.
Boliviya hukumati mamlakat bo‘ylab yuzaga kelgan kuchli yomg‘irlar va suv toshqinlari tufayli favqulodda holat e’lon qildi. So‘nggi oylarda tabiiy ofatlar 50 dan ortiq kishining hayotiga zomin bo‘ldi.
Mamlakat prezidenti Luis Arse hukumat a’zolari ishtirokidagi matbuot anjumanida ushbu favqulodda chorani e’lon qildi.
"Tabiiy ofat bizni favqulodda holat joriy etishga majbur qildi. Bugun biz tegishli farmonni imzoladik, bu ofat oqibatlarini bartaraf etish ishlarini tezlashtiradi", – dedi u.
Prezidentning so‘zlariga ko‘ra, kuchli yomg‘irlar natijasida 209 ta munitsipalitet zarar ko‘rgan. Shuningdek, 818 ta uy butunlay vayron bo‘lgan, 51 kishi halok bo‘lgan va 8 kishi bedarak yo‘qolgan.
Boliviyada yomg‘ir mavsumi 2024-yilning noyabrida boshlangan bo‘lsa, so‘nggi haftalarda vaziyat yanada og‘irlashdi. Mutaxassislarning fikriga ko‘ra, bu so‘nggi 40 yildagi eng kuchli yomg‘irlar hisoblanadi.
