Braziliyaning sobiq prezidenti davlat to‘ntarishiga urinishda ayblanmoqda
Unga 40 yil qamoq jazosi berilishi mumkin.
Braziliya Oliy sudi mamlakatning sobiq prezidenti Jair Bolsonaroga qarshi davlat to‘ntarishiga urinish bo‘yicha ish ochish qarorini chiqardi.
Fevral oyida Bolsonaruga beshta jiddiy ayblov qo‘yilgan edi, jumladan, u prezident Luiz Inasio Lula da Silvaning lavozimga kirishishiga to‘sqinlik qilishga uringanlikda ayblanmoqda.
Sobiq prezident esa barcha ayblovlarni rad etib, o‘zini "siyosiy ta’qib qurboni" deb atamoqda. Agar sud uni aybdor deb topsa, 40 yilgacha ozodlikdan mahrum etilishi mumkin.
Bolsonaroga qarshi ish 2023-yil yanvar oyida sodir bo‘lgan voqealar bilan bog‘liq. O‘shanda uning tarafdorlari poytaxt Braziliyadagi hukumat binolariga bostirib kirib, prezident saylov natijalarini bekor qilishga uringan. Mazkur tartibsizliklar 8-yanvar isyoni nomi bilan tarixga kirgan.
O‘tgan oyda tergovchilar Bolsonaroga yaqin harbiy va siyosiy doiralar ham davlat to‘ntarishini rejalashtirishda ishtirok etganini ma’lum qilishdi. Hozirda sud jarayoni qachon boshlanishi aniq emas, ammo bu Braziliya siyosati uchun katta ahamiyatga ega bo‘lgan masala sifatida ko‘rilmoqda.
