Xitoylik ayol 80 ta kvartirani firibgarlik yo‘li bilan sotdi
Firibgarlik ayolga 3 million dollar keltirgan.
Xitoyning Gansu provinsiyasida 30 yoshli ayol Van Vey 80 ta kvartiraning qulflarini almashtirib, ularni noqonuniy ravishda sotib, 3,3 million dollar ishlab topgan. U o‘zining qarindoshlari va do‘stlariga tegishli bo‘sh xonadonlarning mulk hujjatlarini qalbakilashtirib, firibgarlik yo‘li bilan foyda ko‘rgan.
Van Vey chilangarlarni yollab, kvartiralarning qulflarini almashtirgan va ularni arzon narxlarda sotgan. U ushbu noqonuniy daromadni erkaklar uchun sovg‘alar xarid qilishga sarflagan, jumladan, 1,4 million dollarni sevgilisi Chjan Chjenga o‘tkazgan hamda unga qimmatbaho mashina va ko‘chmas mulk hadya qilgan. Firibgarlik yangi “xaridorlar” kvartiralarga ko‘chib o‘tmoqchi bo‘lganda fosh etilgan.
Hozirda Van Veyga nisbatan tergov olib borilmoqda va u mol-mulkini musodara qilish sharti bilan umrbod qamoq jazosiga hukm qilinishi mumkin. Mazkur firibgarlik Xitoyda ko‘chmas mulk xavfsizligi va nazorat tizimining zaif tomonlarini yana bir bor ko‘rsatib bergan.
