Tramp AQShda favqulodda holat rejimini joriy qildi
Bunga savdoda yuzaga kelgan nomutanosibliklar sabab bo'ldi.
AQSh prezidenti Donald Tramp 2-aprel kuni milliy xavfsizlikni ta'minlash va savdo muvozanatini tiklash maqsadida favqulodda holat rejimini joriy etdi. Bu qaror, AQShning asosiy savdo sheriklari bilan o‘rnatilgan iqtisodiy aloqalardagi nomutanosibliklar va global savdo tizimining noxush holatiga javoban qabul qilindi.
Trampning so‘zlariga ko‘ra, AQShning boshqa davlatlar bilan savdo munosabatlarida "o‘zaro tenglik yo‘q" va bu aloqalar so‘nggi yillarda "juda muvozanatsiz" bo‘lib qolgan. Prezidentning ta'kidlashicha, bu savdo nomutanosibliklari AQShning milliy xavfsizligiga tahdid solmoqda.
Shu bilan birga, Tramp 2-aprel kuni AQShning Yevropa Ittifoqi, Xitoy va boshqa davlatlarga qarshi boj qo‘yish choralari haqida ham ma'lum qildi. Jumladan, Yevropa Ittifoqi tovarlariga 20 foiz, Xitoy tovarlariga esa 34 foiz boj solinadi. Bundan tashqari, Vetnam, Hindiston, Indoneziya, Malayziya, Tayvan, Yaponiya kabi davlatlarga ham yuqori darajadagi bojxona to‘lovlari belgilandi. Moldova, Ukraina va Ozarbayjon kabi mamlakatlarga alohida tariflar qo‘llaniladi.
AQSh jami 185 mamlakatdan keladigan tovarlarga bojxona to‘lovlarini joriy qilgan bo‘lsa-da, Rossiya va Belarus ushbu ro‘yxatga kiritilmagan. Bojlar ikki tomonlama kelishuv asosida belgilanishi ko‘zda tutilgan.
