AQSh harbiy kuchlarini yangicha yo‘nalishga o‘tkazmoqda
AQSh armiyasi qisqaradi, biroq texnologik va harakatchan kuchga aylanadi.
AQSh armiyasi 90 ming nafar harbiy xizmatchidan voz kechishi mumkin. Xabarlarga ko‘ra, bu qisqartirish natijasida AQSh armiyasining umumiy soni 360 ming kishiga tushirilishi rejalashtirilmoqda.
Bu o‘zgarishlar, bir tomondan, byudjetdagi cheklovlar bilan, ikkinchi tomondan esa, harbiy kuchlarni yangi global tahdidlarga – ayniqsa, Tinch okeani mintaqasida kuchayib borayotgan Xitoy ta’siriga qarshi tayyorlash zarurati bilan bog‘liq.
Qisqartirishlar allaqachon boshlangan. O‘tgan yili, asosan, terrorizmga qarshi operatsiyalar bilan bog‘liq 24 mingga yaqin lavozim bekor qilingan edi.
Pentagondagi ayrim manbalar malakali mutaxassislarning armiya safidan ketishi ehtimolini ta’kidlamoqda. Bunga ushbu sohada yetarli motivatsiya va barqarorlik yetishmayotgani, shuningdek, fuqaro sektorida raqobatbardosh ish o‘rinlari mavjudligi sabab bo'lishi mumkin.
Ma’lumotlarga ko‘ra, AQSh Mudofaa vaziri Pit Hegset harbiy byudjetni 8 foizga qisqartirish tarafdori. Shu bilan birga, armiyaning asosiy e’tibori Yevropadagi mavjudlikdan terrochilikka qarshi strategik yo‘nalishlarga o‘tkazilishi rejalashtirilgan.
Pentagon vakillari esa AQSh armiyasi “ixchamroq, zamonaviy texnologiyalar bilan jihozlangan va tezkor harakatlana oladigan” kuchga aylanishini maqsad qilganini aytmoqda.
