Dunyoning eng keksa odami rekordi yangilanishi mumkin
140 yoshli erkak guvohi bo'lgan tarixiy voqealar haqida aytib berdi.
Afg‘onistonning Xost viloyatida istiqomat qiluvchi 140 yoshli Akel Nazir ismli erkak dunyodagi eng uzoq umr ko‘rgan odam sifatida tan olinishi mumkin.
Nazirning yaqinlari hozirda uning yoshing rasmiy hujjatlar orqali tasdiqlashi uchun harakat qilmoqda. Agar bu ma’lumotlar haqiqatga to‘g‘ri kelsa, u insoniyat tarixidagi eng keksa odam maqomiga ega bo‘ladi.
Akel Nazir jurnalistlarga bergan intervyusida Afg‘oniston tarixining muhim voqealarini aniq eslay olishini aytgan. U, xususan, Afg‘oniston qiroli Omonullaxonning hukmronlik yillari (1919–1929) hamda mamlakatning Buyuk Britaniyadan mustaqillikka erishgan sanasi — 1919-yil 19-avgustni yaxshi eslaydi.
Bu kabi esdaliklar uning yoshi borasidagi da’volarni yanada kuchaytiradi. Endi esa jahon rekordlari ro‘yxatini yurituvchi tashkilotlar rasmiy tekshiruv boshlashlari kutilmoqda.
