Turkiyada musodara qilingan mashinalar politsiya ixtiyoriga o‘tkazildi
23 ta qimmat avtomobil jamoat xavfsizligiga xizmat qilmoqda.
Istanbul politsiya boshqarmasi jinoyatchilardan musodara qilingan 23 dona qimmatbaho avtomobildan xizmat maqsadida foydalanishni boshladi.
Turkiya Ichki ishlar vaziri Ali Yerlikaya mazkur avtomashinalarni shaxsan ko‘zdan kechirdi va ularning endi jinoyatchilar qo‘lida emas, balki qonun ustuvorligini ta’minlovchi organlar xizmatida bo‘lishi ramziy ahamiyatga ega ekanini ta’kidladi.
Yaqinda o‘tkazilgan maxsus yirik operatsiyalar davomida Istanbulda faoliyat yuritgan bir nechta uyushgan jinoyatchi guruhlar qo'lga olindi. Operatsiyalar chog‘ida guruh yetakchilari va 111 nafar gumonlanuvchiga nisbatan tergov harakatlari boshlangan.
Musodara qilingan mashinalar orasida Ferrari, Bentley, Porsche va Mercedes-Benz kabi yuqori toifadagi brendlar ham mavjud. Sud qaroriga ko‘ra, bu avtomobillar rasmiy ravishda Istanbul politsiyasi ixtiyoriga o‘tkazilgan va endilikda ular jamoat xavfsizligini ta’minlash xizmatiga jalb etilmoqda.
Bu tashabbus jinoyatga qarshi kurashda nafaqat qonuniy yondashuv, balki ramziy g‘alaba sifatida ham qaralmoqda.
