Rossiya hududlarida kuchli shamol kuzatilmoqda
Hozirda evakuatsiya ishlari boshlangan.
Rossiyaning Janubiy Sibir mintaqasida kuchli shamol va dovullar bir nechta hududlarga jiddiy zarar yetkazdi. Noqulay ob-havo asosan Hakasiyadagi dasht zonasi, Krasnoyarsk va Oltoy o‘lkasi, shuningdek, Novosibirsk va Kemerovo viloyatlarida kuchli yong‘inlarning tarqalishiga sabab bo‘ldi.
Rasmiy manbalarga ko‘ra, shamol natijasida yong'in tezlik bilan kengayib, ayrim aholi punktlarida turar joylarga ham yetib borgan. Hududlarda elektr ta’minoti uzilib, ko‘plab uy xo‘jaliklari elektrsiz qolgan.
Krasnoyarsk o‘lkasining Minusin shahrida favqulodda holat e’lon qilinib, bir nechta mavzelarda aholining evakuatsiyasi boshlab yuborilgan. Qutqaruvchilar vaziyatni nazoratga olishga urinmoqda.
Mahalliy OAVlarning ma’lumotiga ko‘ra, Krasnoyarsk shahrida kuchli shamol bir ayolni balkondan uchirib yuborgan va ayol halok bo‘lgan.
Ob-havo mutaxassislari shamol kuchining ayrim joylarda 25–30 m/s dan oshganini qayd etmoqda. Aholiga zarurat bo‘lmaguncha tashqariga chiqmaslik, xavfsizlik qoidalariga amal qilish tavsiya etilmoqda.
