Mask Trampdan bojlarni kamaytirishni shaxsan so‘radi
U Trampning tarif siyosati bo‘yicha maslahatchisini ham tanqid qilgan.
Tesla va SpaceX asoschisi Ilon Mask AQSh prezidenti Donald Trampdan 200 dan ortiq mamlakatga nisbatan joriy etilishi rejalashtirilgan 10–50 foizlik “ko‘zgu” tariflarini qayta ko‘rib chiqishni shaxsan so‘radi.
Manbalarga ko‘ra, Mask dastlab Trampning tarif siyosati bo‘yicha maslahatchisi Piter Navarroni tanqid qilgan, dam olish kunlari esa bevosita Tramp bilan muloqot qilgan. Ammo bu hali natija bermagan. Nashr bu vaziyatni Tramp va uning eng yaqin maslahatchilari orasidagi “eng jiddiy kelishmovchilik” deya baholadi.
Trampning boj siyosati AQShdagi eng yirik donorlar tomonidan keskin tanqidga uchradi. “Home Depot” asoschisi Ken Langone va investitsiya boshqaruvchisi Stenli Drukkenmiller bojlarni haddan tashqari yuqori va xatarli deb baholadi. Tramp esa “ba’zida iqtisodiyotni davolash uchun dori kerak bo‘ladi”, deya o‘z pozitsiyasini saqlab qolmoqda.
