Nigeriyada qurolli hujum sodir bo'ldi
Fojia oqibatida 52 kishi halok bo'lgan.
Nigeriyaning shimolida joylashgan Plato shtatida ketma-ket amalga oshirilgan qurolli hujumlar natijasida kamida 52 kishi halok bo‘lgan, yana 2000 ga yaqin aholi xavfsiz hududlarga ko‘chishga majbur bo‘ldi. Bu haqda mamlakat favqulodda vaziyatlar milliy agentligi xabar bermoqda.
Ma’lumotlarga ko‘ra, hujumlar o‘tgan hafta Bokkos okrugidagi oltita qishloqda sodir bo‘lgan. Hujumlarning aniq sabablari hozircha noma’lum. Rasmiylarga ko‘ra, bu voqealar 2023-yil dekabridan beri mintaqada qayd etilgan eng yirik zo‘ravonlik to‘lqini hisoblanadi — o‘shanda ham yuzdan ortiq odam hayotdan ko‘z yumgandi.
Plato shtati uzoq yillardan buyon dehqonlar va chorvadorlar o‘rtasidagi zamin mojarolari, etnik va diniy ziddiyatlar bilan bog‘liq to‘qnashuvlarga guvoh bo‘lib kelmoqda.
Nigeriya Prezidenti Bola Tinubu esa mamlakat xavfsizlik xizmatlariga hujumchilarning shaxsini aniqlab, ularni jazolashni buyurgan.
