Turkiyaga 7 mingta BYD avtomobili olib kelindi
Kompaniya mamlakatda o‘z ulushini kengaytirishga harakat qilmoqda.
Xitoyning avtomobil giganti BYD o‘z mahsulotlarini xalqaro bozorga yetkazib berishda yirik qadam tashladi. Uzunligi 199 metr, kengligi 38 metr bo‘lgan “BYD CHANGZHOU” nomli yuk tashuvchi kema 21 kun davom etgan okean safaridan so‘ng Turkiyaning Istanbul shahrida joylashgan Sefaport portiga yetib keldi.
Mahalliy ommaviy axborot vositalarining xabar berishicha, ushbu kema bortida 7 ming dona BYD avtomobili olib kelingan. Bu mashinalar Turkiya bozorida sotuvga chiqarilishi rejalashtirilgan bo‘lib, kompaniya mamlakatda o‘z ulushini kengaytirishga harakat qilmoqda.
Mutaxassislarning fikricha, bu yirik yuk partiyasi BYD’ning Yevropa bozoriga chiqish strategiyasida muhim qadamlardan biridir. Turkiya geografik jihatdan Yevropaga yaqinligi sababli, kompaniya uchun muhim logistika markaziga aylanmoqda.
