Hindistonda soxta jarroh 15 kishini operatsiya qildi
Operatsiya qilingan 7 nafar bemor vafot etgan.
Hindistonning Madhya-Pradesh shtatiga qarashli Damoh tumanida o‘zini britaniyalik yurak jarrohi sifatida tanishtirgan shaxsga nisbatan tergov ishlari boshlandi.
Maʼlumotlarga ko‘ra, u o‘zini britaniyalik kardiolog sifatida ko‘rsatib, soxta hujjatlar orqali xususiy shifoxonada ish boshlagan va kamida 15 nafar bemorga yurak operatsiyalarini o‘tkazgan.
Hindistonning Inson huquqlari milliy komissiyasi aʼzosi mazkur ish bo‘yicha rasmiy tergov boshlanganini maʼlum qilgan.
“Yuragiga operatsiya qilingan bemorlar orasida kamida 7 kishining bevaqt o‘limi qayd etilgan”, — deb yozdi u o‘zining ijtimoiy tarmoq sahifasida.
Voqea yuzasidan jamoatchilikda jiddiy norozilik yuzaga kelmoqda. Bemorlar qarindoshlari shifokorning harakatlaridan shubhalana boshlaganidan so‘ng, u izsiz g‘oyib bo‘lgan.
