Microsoft dunyoning eng qimmat kompaniyasi unvonini qaytarib oldi

 

Microsoft yana dunyoning eng qimmat kompaniyasiga aylandi. So‘nggi savdo sessiyalarida Apple aksiyalarining 23 foizga arzonlashuvi ortidan Microsoft bozor kapitallashuvi bo‘yicha peshqadamlikni qaytarib oldi.

 

2024-yil 8-aprel holatiga ko‘ra, Microsoft’ning kapitallashuvi 2,64 trillion dollarni tashkil qilgan bo‘lsa, Apple kompaniyasining bozor qiymati 2,59 trillion dollarga tushib ketgan.

 

Mutaxassislar bunday pasayishni AQSh va Xitoy o‘rtasidagi kuchayib borayotgan savdo urushi fonida investorlarning xavotiri bilan izohlashmoqda. Ayniqsa, Apple uchun bu xavf yuqori baholanmoqda — kompaniya mahsulotlarining katta qismi, jumladan iPhone’lar, aynan Xitoyda ishlab chiqariladi. Shveytsariyaning UBS banki tahlilchilari ma'lumotlariga ko‘ra, Xitoydan import qilinadigan mahsulotlarga bojlarning oshishi Apple’ga sezilarli zarar yetkazadi. Ularning hisobiga ko‘ra, AQShda iPhone 16 Pro Max narxi 350 dollarga qimmatlashishi mumkin.

 

Aksincha, Microsoft bu geosiyosiy xavflarga kamroq ta’sirchan hisoblanadi. Jefferies investitsiya banki ekspertlari Microsoft’ni "savdo tariflari tomonidan yaratilgan noaniqlikdan yaxshiroq himoyalangan kompaniya" deb atamoqda. Bu kompaniyaning Xitoyga kamroq ishlab chiqarish bog‘liqligi va diversifikatsiyalangan biznes modeli bilan izohlanadi.

 

Eslatib o‘tamiz, Microsoft 2021 va 2024-yil yanvar oylarida ham qisqa muddatga dunyoning eng qimmat kompaniyasi bo‘lib turgan, biroq keyinchalik Apple bu unvonni qaytargan edi.