Tramp deportatsiyaga qarshi chiqqanlarni jarimaga tortishni rejalashtirmoqda
Mamlakatni tark etmagan muhojirlar kuniga 998 AQSH dollari miqdorida jarimiga tortiladi.
AQSh prezidenti Donald Tramp ma’muriyati mamlakatni belgilangan muddatda tark etmagan muhojirlarga nisbatan qat’iy choralarni qo‘llashni rejalashtirmoqda. Xabarlarga ko'ra, deportatsiya qarori chiqsa-da, AQShni tark etmaydigan shaxslar kuniga 998 AQSh dollari miqdorida jarimaga tortilishi mumkin.
Bu choralar 1996-yilda qabul qilingan qonunga tayanadi. Tramp o‘zining oldingi prezidentlik davrida ushbu qonunni 2018-yilda cherkovlarda boshpana izlagan to‘qqiz muhojirga nisbatan qo‘llab, ularga yuz minglab dollar miqdorida jarima solgan edi.
Yuqori martabali rasmiylarning ma’lum qilishicha, Tramp ushbu choralarni besh yil orqaga qarab qo‘llash imkoniyatini ham ko‘rib chiqmoqda, bu esa ayrim muhojirlar uchun jarima miqdorini 1 million dollardan oshirib yuborishi mumkin.
Tramp ma’muriyatining bu yondashuvi ko‘proq muhojirlarni qo‘rqitish va jamoatchilik ustidan nazoratni kuchaytirish maqsadida amalga oshirilayotgani aytilmoqda. Eslatib o‘tamiz, prezident Jo Bayden lavozimga kelgach, bu jarimalarni bekor qilgan edi.
