iPhone narxi uch baravar oshishi mumkin
Apple ishlab chiqarishni AQShga ko‘chirishni rejalashtirmoqda.
iPhone narxi kelajakda uch baravar oshishi mumkin. Wedbush Securities kompaniyasi mutaxassisi Den Ives bergan intervyusida, agar Apple ishlab chiqarishni to‘liq AQShga ko‘chirishga qaror qilsa, smartfon narxi hozirgi 1000 dollardan 3500 dollargacha ko‘tarilishi mumkinligini aytdi.
Bugungi kunda iPhone’lar asosan Osiyoda ishlab chiqariladi. Chiplar Tayvanda, ekranlar Janubiy Koreyada tayyorlanadi, yakuniy yig‘ishning 90 foizi esa Xitoyda amalga oshiriladi. Ammo AQSh va Xitoy o‘rtasida kuchaygan savdo urushi sababli, Apple ta’minot zanjirini qayta ko‘rib chiqishga majbur bo‘lmoqda.
AQSh 125 foiz boj joriy qilgan bo‘lsa, Xitoy ham javoban 84 foiz boj qo‘lladi. Bu esa Apple’ni ishlab chiqarishni AQShga, jumladan G‘arbiy Virjiniya va Nyu-Jersi shtatlariga ko‘chirishga undamoqda. Hisob-kitoblarga ko‘ra, ishlab chiqarishning atigi 10 foiz qismini ko‘chirish ham 30 milliard dollarga tushadi va 3 yil vaqt oladi.
Ekspertlarning ta’kidlashicha, Apple’ning butun ishlab chiqarish tizimini AQShda qayta qurish qiyin, chunki bunday darajadagi malakali ishchi kuchi va infratuzilma hozircha mavjud emas. Shu sababli, ishlab chiqarishni qisman Meksika, Kanada yoki Yevropaga ko‘chirish ehtimoli ham ko‘rib chiqilmoqda.
Counterpoint Research kompaniyasi iPhone narxi ishlab chiqarish joyiga qarab 30 foizgacha oshishini aytgan. Rosenblatt Securities esa, agar Apple boj xarajatlarini to‘liq iste’molchiga yuklasa, narx 43 foizga qimmatlashishini taxmin qilmoqda.
Xabarlarga ko‘ra, bojlar e’lon qilingach, Apple do‘konlarida navbatlar paydo bo‘lib, xaridorlar narxlar yana oshishidan xavotirda.
