Venesuelada favqulodda iqtisodiy vaziyat e’lon qilindi
Prezident bu qarorni milliy iqtisodiy barqarorlikni ta’minlashga qaratilgan deb ta’rifladi.
Venesuela prezidenti Nikolas Maduro mamlakatda 60 kunlik iqtisodiy favqulodda holat e’lon qildi. Prezidentning ta’kidlashicha, bu choralar Venesuela iqtisodiyotini AQShning bosimi va sanksiyalaridan himoya qilishga xizmat qiladi. Maduro bu qarorni milliy iqtisodiy barqarorlik va o‘sishni ta’minlashga qaratilgan deb ta’rifladi.
Farmonga ko‘ra, hukumat barcha darajadagi soliqlarni vaqtincha to‘xtatib turish, tasdiqlangan byudjetdan tashqari moliyalashtirish imkoniyatini yaratish, soliq to‘lashdan bo‘yin tovlashga qarshi kurash va import o‘rnini bosuvchi sohalarni rivojlantirish choralarini ko‘radi. Prezident, shuningdek, sarmoyadorlarga maxsus imtiyozlar va’da qildi.
Farmon kuchga kirishi uchun Venesuela Milliy majlisi va Oliy sudning Konstitutsiyaviy palatasi tomonidan tasdiqlanishi lozim. Hozircha xalqaro hamjamiyat bu qarorni ehtiyotkorlik bilan kuzatmoqda.
