AQSHda firibgarlar vaqt chegarasini buzmoqda
2154-yilda tug‘ilgan fuqaro AQSh hukumatidan 41 ming dollar talab qildi.
AQSh Hukumat Samaradorlik Departamenti (DOGE) so‘nggi paytlarda ijtimoiy xavfsizlik tizimida ro‘y bergan rekord darajadagi firibgarlik holatlarini fosh qildi. Ta’kidlanishicha, o‘zini 2154-yilda tug‘ilgan deb tanishtirgan shaxs mamlakatdan 41 ming dollarlik ishsizlik nafaqasini talab qilgan.
Biroq bu shunchaki g‘alati da’vo emas edi. DOGE tomonidan olib borilgan tekshiruvlar natijasida, 2040-yil va undan keyin tug‘ilgan deb ko‘rsatilgan yana 9700 ta ariza aniqlanib, ularning umumiy summasi 69 million dollarni tashkil etgani ma’lum bo‘ldi.
Shuningdek, 115 yoshdan oshgan fuqarolarning nomidan topshirilgan 24,5 mingta ariza orqali 59 million dollar so‘ralgan. Eng hayratlanarlisi, 1 yoshdan 5 yoshgacha bo‘lgan bolalar nomidan topshirilgan 28 ming ariza orqali nafaqa talab qilingan — ularning umumiy summasi ham 254 million dollargacha yetgan.
DOGE rahbari Ilon Mask holatga kinoyali tarzda munosabat bildirib, "Ishonch bilan ayta olamizki, 115 yoshdan katta har bir fuqaro allaqachon vafot etgan va ularning nafaqa olishga haqqi yo‘q", deya bayonot berdi.
Eslatib o‘tamiz, DOGE 2025-yil yanvarida AQSh hukumati tomonidan korrupsiyaga qarshi vaqtinchalik idora sifatida tashkil etilgan.
