Hindistonda chaqmoq chaqishi natijasida 50 dan ortiq odam halok bo'ldi
Mutasaddilar aholiga vaqtincha ochiq havoga chiqmaslik va xavfsiz joylarda bo‘lishni tavsiya qilmoqda.
Hindistonning sharqiy Bihar shtatida kuchli chaqmoq va yomg‘irli ob-havo og‘ir talafotlarga sabab bo‘ldi. Rasmiy ma’lumotlarga ko‘ra, birgina Nalanda okrugida 18 kishi, umumiy hisobda esa 25 kishi halok bo‘lgan. Mahalliy siyosatchilarning ta’kidlashicha, qurbonlar soni 50 nafardan oshgan bo‘lishi mumkin.
Bu haqda PTI agentligi va Bihar shtati bosh vaziri idorasi bayonotlar berdi. Halok bo‘lganlar soni bir necha okruglarda qayd etilgan bo‘lib, voqealar kuchli bo‘ron, chaqmoq chaqishi, daraxt va devorlarning qulashi kabi hodisalar bilan bog‘liq.
Rashtriya Janata Dal partiyasi yetakchisi Tejashvi Yadav X (sobiq Twitter) sahifasida voqea yuzasidan chuqur qayg‘uda ekanligini bildirib, “Men Biharda bo‘ron, yomg‘ir, chaqmoq va boshqa hodisalarda 50 dan ortiq kishining halok bo‘lganidan qayg'udaman”, deb yozdi.
Chorshanba kuni ham shtatning to‘rtta okrugida 13 kishi chaqmoq urishi oqibatida hayotdan ko‘z yumdi. Hodisalar aholining ochiq hududda yoki uylarida bo‘lishiga qaramay sodir bo‘lgan.
Hindiston Meteorologiya Boshqarmasi Bihar shtatining ayrim hududlari uchun “qizil darajali” ogohlantirish e’lon qildi. Bu ogohlantirish aholiga ehtiyot choralarini ko‘rish va noqulay ob-havoga tayyor turishni bildiradi.
