Qozog‘istonda nodir yer metallarining yirik koni topildi
Mazkur e’lon Yevropa Ittifoqi bilan hamkorlikni kuchaytirish bo‘yicha strategik qadam sifatida baholanmoqda.
Yevropa Ittifoqi – Markaziy Osiyo sammiti arafasida Qozog‘iston hukumati noyob yer elementlari zaxiralari aniqlanganini e’lon qildi. Qarag‘anda viloyatida joylashgan “Yangi Qozog‘iston” deb nomlangan kon hududida taxminan 1 million tonnaga yaqin seriy, lantan, neodimiy va ittriy kabi elementlar mavjud. Bu elementlar asosan smartfonlar, raqamli kameralar va boshqa raqamli qurilmalarda qo‘llaniladi.
Qozog‘iston Sanoat va qurilish vazirligiga ko‘ra, ushbu hududda aniqlangan umumiy zaxira 935,4 ming tonnani tashkil etadi, lekin dastlabki hisob-kitoblarga ko‘ra bu ko‘rsatkich 20 million tonnagacha yetishi mumkin. Biroq, mutaxassislar hali bu konda to‘liq geologik va iqtisodiy tahlil olib borilishi zarurligini ta’kidlashmoqda.
Mazkur e’lon Yevropa Ittifoqi bilan hamkorlikni kuchaytirish bo‘yicha strategik qadam sifatida baholanmoqda. Qozog‘iston hozirda texnologik imkoniyatlarga ega emasligi sababli xorijiy investorlar va hamkorlar, jumladan Xitoy va YeI bilan hamkorlik qilishga tayyorlanmoqda. Konni ishga tushirish uchun 10-12 yil va taxminan 10 million dollar sarmoya talab etilishi mumkin.
