Tramp Grenlandiyani AQSh tarkibiga qo‘shish bo‘yicha aniq rejalar tuzdi
Grenlandiyaliklarga yiliga 10 ming dollardan berishini aytgan.
Xabarlarga ko‘ra, Tramp ma'muriyati Grenlandiyani Qo‘shma Shtatlar tarkibiga qo‘shish rejasini ishlab chiqib, bu haqdagi ko‘rsatmalarni tegishli idoralarga yuborgan. Rejaga ko‘ra, orol aholisining AQSh bilan birlashish istagini o‘zi ilgari surishi uchun maxsus media kampaniya o‘tkazilishi ham mo‘ljallangan.
Ma'lumotlarda bu kampaniya allaqachon ish boshlangani aytilmoqda. AQSh rasmiylari Daniya Grenlandiya aholisiga yetarli darajada e’tibor bermayotganini ochiq aytmoqda. Shuningdek, faqat Qo‘shma Shtatlar orolni Rossiya va Xitoy ta’siridan himoya qila olishini ta’kidlashmoqda. Tramp esa AQSh grenlandiyaliklarga “boyib ketishda” yordam berishini bildirgan.
Bundan tashqari, Tramp ma'muriyati Grenlandiya aholisi uchun moliyaviy rag‘batlantirish choralarini ham ko‘rib chiqmoqda. Masalan, Daniya har yili ajratadigan 600 million dollarlik subsidiyalar o‘rniga, har bir fuqaro uchun yiliga taxminan 10 ming dollar to‘lov joriy etilishi mumkin.
Ma’muriyatdagi ayrim amaldorlar bu xarajatlar Grenlandiyadagi mis, oltin, uran va neft kabi tabiiy boyliklardan olinadigan daromadlar orqali qoplanishini hisobga olishmoqda.
