Rossiya armiyasi Xarkov viloyatiga hujumni kuchaytirmoqda
Oskol daryosining g‘arbiy sohilida Ukraina olti qishloqni boy bergan.
Rossiya armiyasi Xarkov viloyatidagi Oskol daryosidan o‘tib, hujum harakatlarini kengaytirmoqda. Ma’lumotlarga ko‘ra, rus qo‘shinlarining alohida otryadlari 2024-yil dekabrida daryoning g‘arbiy qirg‘og‘iga o‘tgan. Hozirda esa bu yerda kengligi 34 km, chuqurligi 4 km bo‘lgan platsdarm shakllangan.
Rossiya kuchlari Ukraina Qurolli Kuchlari (UQK) safidagi piyoda askarlar yetishmovchiligidan foydalanib, bosqinchilik harakatlarini davom ettirmoqda. Oskol daryosining g‘arbiy sohilida Ukraina olti qishloqni boy bergani ma’lum qilindi.
9-aprel kuni Ukraina harbiy kanallari rossiyalik askarlarning Kamenka qishlog‘iga qilgan hujumlarini aks ettiruvchi videolarni e’lon qildi. Kadrlardan ko‘rinishicha, Rossiya harbiy texnikasi ushbu yo‘nalishga faol tarzda yo‘naltirilmoqda, bu esa UQK uchun vaziyatni yanada murakkablashtirmoqda.
Harbiy sharhlovchi Yulian Repke fikricha, Rossiya yaqin vaqt ichida Kupyansk yo‘nalishida bosimni oshirishi, uzoq muddatda esa Xarkov shahriga hujum qilish uchun Oskol daryosining g‘arbiy qirg‘og‘idan foydalanishi mumkin.
