Rossiya koinotda yadro quroli joylashtirmoqchi
Rossiya sun’iy yo‘ldoshlarga qarshi qurol ishlab chiqmoqda.
NATO bosh kotibi Mark Ryutte Rossiya koinotda yadro quroli joylashtirish imkonini ko‘rib chiqayotgani haqida ogohlantirdi. Unga ko‘ra, bu qurol sun’iy yo‘ldoshlarga qarshi qo‘llanilishi mumkin.
Ryuttening ta’kidlashicha, Rossiyaning mavjud koinotdagi salohiyati zamonaviy G‘arb texnologiyalaridan orqada qolgan. Shu bois Moskva o‘z qudratini oshirish uchun yadroviy texnologiyalar orqali ustunlikka erishishga urinmoqda.
Bosh kotib NATOning bu yangi tahdidlarga qarshi choralar ko‘rayotganini aytib, quyidagi harakatlarni sanab o‘tdi: razvedka ma’lumotlari almashinuvi, milliy koinot qo‘mondonliklari tashkil etilishi va himoyalangan sun’iy yo‘ldoshlar ishlab chiqilishi.
"Bugungi kunda koinot tobora tiqilinch, tahlikali va oldindan bashorat qilib bo‘lmaydigan makonga aylanyapti", — dedi u.
Ryutte shuningdek, NATO ilk bor Arktika hududida sun’iy yo‘ldoshlar orqali kuzatuvni kengaytirayotganini ma’lum qildi. Uning aytishicha, Xitoy va Rossiya mintaqadagi yangi dengiz yo‘llaridan faol foydalanmoqda va ayrim hududlarni harbiylashtirmoqda.
"Sun’iy yo‘ldoshlar orqali biz harakatlarni nazorat qilishimiz, qo‘shinlarimizni ishonchli va xavfsiz aloqalar bilan ta’minlashimiz mumkin", — dedi NATO rahbari.
