Isroil harbiylari G‘azodagi 1,2 kilometrlik tunnelni yo‘q qildi
Tunnel yaqinidan 20 ga yaqin portlovchi qurilmalar topilgan.
Isroil mudofaa kuchlari (IDF) G‘azo sektorining shimoliy qismida joylashgan, HAMAS harakatiga tegishli deb hisoblangan 1,2 kilometr uzunlikdagi va 20 metr chuqurlikdagi tunnelni yo‘q qilganini ma’lum qildi. IDF matbuot xizmatining xabar berishicha, bu tunnel harbiy operatsiyalar uchun mo‘ljallangan bo‘lib, u orqali HAMAS jangchilari urushda harakat qilgan.
Operatsiya davomida IDF dronlari qo‘shinlar yaqinida portlovchi moslama o‘rnatayotgan bir necha shaxsni aniqlab, ularni nishonga olib yo‘q qilgan. Tunnel yaqinida 20 ga yaqin portlovchi qurilmalar, tankka qarshi raketalar va boshqa qurollar saqlangan ombor ham aniqlangan.
Shu kuni ertalab Isroil armiyasi G‘azo shimolidagi Al-Ahli kasalxonasiga ham zarba berganini e’lon qildi. Isroil tomoni bu yerda HAMAS qo‘mondonlik markazi joylashganini bildirgan. Zarba berilishidan oldin shifoxona va tinch aholiga zarar yetkazmaslik uchun ehtiyot choralar ko‘rilgani ta’kidlandi.
