Olimlar yangi tish o‘stirish texnologiyasini yaratdi
Sun’iy tish o‘rniga tabiiy o‘sadigan tish ishlab chiqildi.
Buyuk Britaniyadagi King's College hamda London Imperial College olimlari inson tishlarini laboratoriya sharoitida muvaffaqiyatli tarzda o‘stira olishdi. Ular tish rivojlanishidagi tabiiy muhitni taqlid qiluvchi maxsus biomaterial yaratishdi. Bu material hujayralarga signal yuborib, ularning yangi tish to‘qimalarini hosil qilishiga yordam beradi.
Agar bu texnologiya amaliyotda keng qo‘llanilsa, plombalar va implantlar o‘rnini bosishi mumkin. Maxsus biomaterial jag‘ suyaklariga birikadi va vaqt o‘tishi bilan tabiiy tishni tiklash jarayonini boshlaydi.
Olimlar bu yondashuvni ikki xil usulda amalga oshirishni taklif qilishmoqda:
- Laboratoriyada tishni to‘liq o‘stirib, so‘ng bemorga transplantatsiya qilish.
- Tishni shakllantirish jarayonini to‘g‘ridan-to‘g‘ri og‘iz bo‘shlig‘ida davom ettirish uchun jag‘ga biomaterial joylashtirish.
Ushbu innovatsiya stomatologiyada tub burilish yasab, tishlarni tabiiy ravishda tiklashning yangi davrini boshlab berishi mumkin.
