Yaponiya aholisi keskin kamaymoqda
1950-yildan beri eng yirik pasayish qayd etildi.
Yaponiya tarixdagi eng keskin demografik pasayish holatini boshdan kechirmoqda. 2024-yil 1-oktabr holatiga ko‘ra, mamlakat aholisi o‘tgan yilga nisbatan 898 ming kishiga kamaydi. Bu 1950-yildan beri yuritilayotgan statistik kuzatuvlardagi eng katta yillik yo‘qotishdir.
Yaponiya fuqarolari soni hozirda 120,3 million kishini tashkil etmoqda. Xorijlik rezidentlar bilan birgalikda umumiy aholining soni 123,8 millionga teng, bu esa 550 ming kishilik kamayishni anglatadi. Mamlakatda aholi sonining pasayishi ketma-ket 14-yildan beri davom etmoqda.
Ma'lum qilinishicha, Yaponiya dunyodagi eng past tug‘ilish ko‘rsatkichlariga ega bo‘lib qolmoqda. 2024-yil fevralida esa 100 yillik tug‘ilish antirekordi qayd etildi. Shu bilan birga, o‘lim holatlari esa tarixiy eng yuqori darajaga yetdi.
Bu demografik o‘zgarishlar mehnat bozoriga bevosita ta’sir ko‘rsatmoqda — kompaniyalar malakali ishchi kuchi tanqisligidan aziyat chekmoqda. Hukumat yosh xorijiy mutaxassislarni jalb etish yo‘llarini ko‘rib chiqmoqda, biroq migratsiya qoidalari hanuz qat’iyligicha qolmoqda.
Vazirlar Mahkamasi bosh kotibi Yoshimasa Xayashi hukumat yosh oilalarni iqtisodiy qo‘llab-quvvatlashga qaratilgan chora-tadbirlar ustida ishlayotganini ta’kidladi. Maqsad — har bir farzand ko‘rishni istagan oilaga bu qarorni amalga oshirishga imkon berishdir.
Ma'lumotlarga ko‘ra, yoshlar orasida oila qurish istagi pasayib bormoqda. Sabablari orasida beqaror bandlik, hayot tarzidagi o‘zgarishlar va ijtimoiy qarashlarning evolyutsiyasi bor.
