AQSh portlariga Rossiya kemalari kirishini taqiqlovchi farmon uzaytirildi
Tramp Rossiya kemalari kirishini 2026-yilgacha man qildi.
AQSh prezidenti Donald Tramp mamlakat portlariga Rossiya bilan bog‘liq kemalarning kirishini taqiqlovchi chorani yana bir yilga uzaytirdi. Bu haqda Oq uy hujjatlari Federal reyestrda e’lon qilindi.
Xabarlarga ko‘ra, taqiq Rossiya bayrog‘i ostida yuradigan yoki Rossiya Federatsiyasi bilan aloqador bo‘lgan barcha kemalarni qamrab oladi. Trampning bayonotida qayd etilishicha, “Rossiya hukumatining siyosati va harakatlari AQSh tashqi siyosatiga zarar yetkazishda va milliy favqulodda holatni yuzaga keltirishda davom etmoqda”.
Eslatib o‘tamiz, ushbu cheklov ilk bor 2022-yil 21-aprelda Prezident Jo Bayden tomonidan joriy qilingan edi. Yangi farmonda Rossiyaga aloqador deb topilgan kemalarning aniqlanish mezonlari ham qayd etilgan: bu kemalar Rossiya bayrog‘i ostida yurishi, egasi Rossiya hukumati, kompaniyasi, fuqarosi yoki doimiy rezidenti bo‘lishi, yoki kemani tijorat maqsadlarida boshqarayotgan shaxslar Rossiyaga tegishli bo‘lishi kerak.
Mazkur qaror AQShning Rossiyaga qarshi davom etayotgan siyosiy va iqtisodiy sanksiyalari doirasida amalga oshirilmoqda.
