Britaniyada Googlega qarshi da'vo qo'zg'atildi
Google raqobatni suiiste’mol qilgani uchun 6,6 milliard dollarlik ayblovga duch kelmoqda.
Texnologiya giganti Google Buyuk Britaniyada yirik huquqiy bosim ostida qoldi. Kompaniyaga qarshi 5 milliard funt sterling (taxminan 6,6 milliard dollar) miqdorida jamoaviy da’vo arizasi sudga taqdim etildi. Xabarlarga ko‘ra, ish materiallari mamlakatning raqobat bo‘yicha apellyatsiya sudiga kelib tushgan.
Da’vogarlar Google’ni onlayn qidiruv bozorida hukmronlik mavqeini suiiste’mol qilganlikda ayblamoqda. Ularning fikricha, kompaniya raqobatchilarning rivojlanishiga to‘sqinlik qilgan va qidiruv reklamalariga oid xizmatlarida monopol holat yaratgan. Bu orqali Google o‘z platformasini reklama joylashtirishda yagona variantga aylantirgan.
Da’vogarlar advokati Or Brukning ta’kidlashicha, Google reklama narxlarini sun’iy ravishda yuqori darajada ushlab turish uchun qidiruv bozoridagi ustunlikdan foydalangan.
Shuningdek, da’voda qayd etilishicha, kompaniya smartfon ishlab chiqaruvchilari bilan Android qurilmalariga Google Search va Chrome brauzerini oldindan o‘rnatish shartini qo‘ygan. Bundan tashqari, Apple kompaniyasiga Safari brauzerida Google’ni standart qidiruv tizimi sifatida saqlash evaziga milliardlab dollar to‘lagani ham da’vo mazmuniga kiritilgan.
Mutaxassislar ushbu ish texnologik monopoliyalarga qarshi kurashda muhim burilish bo‘lishi mumkinligini ta’kidlashmoqda.
