Ozarbayjon muzeyida Buxoro Amirining nodir sovg‘alari saqlanadi
Amir sovg‘alarni ikki millat o‘rtasidagi o‘zaro hurmat ramzi sifatida yuborgan.
Ozarbayjon Milliy tarix muzeyi o‘zining qimmatbaho eksponatlari qatorida Buxoro Amiri tomonidan yirik neft magnati Zaynulobiddin Tag‘iyevga taqdim etilgan yuksak sanʼat namunasi bo‘lgan taqinchoqlar va buyumlarni saqlamoqda. Bu nodir sovg‘alar XIX asr oxiri — XX asr boshlarida ikki mintaqa o‘rtasidagi madaniy va do‘stona munosabatlar ramzi sifatida baholanadi.
Sovg‘alarning har biri o‘z davrining yuksak hunarmandchilik anʼanalarini ifoda etadi — ular Buxoro ustalari tomonidan zariflik bilan ishlangan bo‘lib, zargarlik sanʼatining eng yaxshi anʼanalarini o‘zida mujassam etgan. Amir bu sovg‘alarni nafaqat shaxsiy ehtirom sifatida, balki ikki millat o‘rtasidagi o‘zaro hurmat ramzi sifatida yuborgan.
Ayni paytda, ushbu tarixiy artefaktlarning nusxalari O‘zbekistondagi Islom sivilizatsiyasi markazida namoyishga qo‘yilishi rejalashtirilgan. Bu ham madaniy merosimizni asrab-avaylash, ham ikki qardosh xalq o‘rtasidagi tarixiy aloqalarni yana-da mustahkamlashga xizmat qiladi.
