Rim Papasi Fransisk vafot etdi
U Rim-katolik cherkoviga 12 yil rahbarlik qilgan.
Rim-katolik cherkovi yetakchisi, papa Fransisk 88 yoshida vafot etdi. Bu haqda Vatikan telekanali orqali kardinal Kevin Farrell xabar berdi.
Fevral oyining o‘rtalarida pontifik nafas yo‘llari infeksiyasi bilan kasalxonaga yotqizilgan va mart oyining oxirigacha shifoxonada qolgan. 23 mart kuni pnevmoniyadan davolanishdan so‘ng Vatikan hududiga qaytgan edi. 20 aprel kuni u Avliyo Pyotr sobori maydonida dindorlarni Pasxa bayrami bilan tabriklash uchun so‘nggi bor omma oldida ko‘rinish bergan.
Argentinada tug‘ilgan papa Fransisk 2013 yilda taxtga o‘tirgan bo‘lib, Rim-katolik cherkoviga 12 yil rahbarlik qilgan. U yoshligida og‘ir kasallik sabab o‘pkasining bir qismini oldirgan, shuning uchun nafas yo‘llari bilan bog‘liq kasalliklardan tez-tez aziyat chekkan. So‘nggi yillarda esa tizzalaridagi muammolar tufayli nogironlik aravachasi va hassadan foydalangan.
Papa Fransisk jahon miqyosida tinchlik, iqlim muhofazasi va ijtimoiy adolat masalalarida faol chiqishlari bilan tanilgan edi. Vatikanda yangi pontifik saylovi yaqin kunlarda e’lon qilinishi kutilmoqda.
