Oksford kolleji tadbirlarida odam bosh suyagidan yasalgan idishdan foydalanilgan
Idish 225 yillik tarixga ega.
Buyuk Britaniyaning nufuzli Oksford universitetiga qarashli Worcester kolleji o‘nlab yillar davomida rasmiy kechki tadbirlarda inson bosh suyagidan tayyorlangan maxsus piyoladan foydalangan. Bu haqda Pitt Rivers muzeyi direktori, professor Den Xiks o‘zining yangi “Har bir yodgorlik quladi” nomli kitobida ma’lum qildi.
Ma'lum qilinishicha, bu noodatiy idish sayqallangan va arralangan bosh suyagidan yasalgan bo‘lib, uning chetlari va asosi kumush bilan bezatilgan. Piyola 2015-yilgacha Worcester kollejida sharob va shokolad kabi mahsulotlarni tortish uchun rasmiy kechki ovqatlarda ishlatilgan.
Radiokarbon tahlillari idish taxminan 225 yillik tarixga ega ekanligini ko‘rsatgan. Bilvosita dalillarga ko‘ra, bosh suyak Karib dengizi orollaridan olib kelingan qulga tegishli bo‘lishi mumkin. Biroq, suyak egasining aniq shaxsi noma’lumligicha qolmoqda.
Mazkur g‘ayrioddiy piyolani kollejga 1946-yilda Jorj Pitt-Rivers sovg‘a qilgan. U fashizm va yevgenikani qo‘llab-quvvatlagan shaxs bo‘lib, Ikkinchi jahon urushi paytida internatsiya qilingan. Uning bobosi — general Pitt-Rivers esa artefaktni 1884-yilda Sotheby’s auktsionidan xarid qilgan. Piyoladagi kumush belgilar uning 1838-yilda, qirolicha Viktoriya taxtga chiqqan yili ishlanganini ko‘rsatadi.
Talabalar va mehmonlar noroziligidan so‘ng, idish 2011-yildan boshlab kamdan-kam qo‘llanila boshlagan va oxir-oqibat, 2015-yilda butunlay olib tashlangan. 2019-yilda kolleji rasmiylari professor Hiksga uning tarixini o‘rganish vazifasini yuklagan.
Hozirda piyola arxivda "ehtirom bilan" saqlanmoqda va keng jamoatchilik uchun yopiq.
Ma'lumot uchun Worcester kolleji Oksford universitetining 39 ta kollejidan biri bo‘lib, 1714-yilda tashkil etilgan.
