Yevropa Ittifoqining eng qarzdor davlatlari e’lon qilindi
Gretsiya, Italiya va Fransiya – Yevropaning eng ko‘p qarzga botgan mamlakatlari hisoblanadi.
2024-yil yakunlariga ko‘ra, Fransiya Yevropa Ittifoqida eng yuqori davlat qarziga ega bo‘lgan uch davlat qatoriga kirdi. Interfaks xabariga ko‘ra, mamlakatning umumiy davlat qarzi yalpi ichki mahsulotning (YaIM) 113 foizini tashkil etgan.
Yevrostat — Yevropa Ittifoqi statistika idorasi ma’lumotlariga ko‘ra, 2024-yilda ittifoqning umumiy davlat qarzi YaIMning 81 foizini tashkil qilib, 2023-yildagi 80,8 foizga nisbatan biroz oshgan.
Davlat qarzi bo‘yicha yetakchi beshlik quyidagicha:
- Gretsiya – YaIMning 153,6 foizi
- Italiya – 135,3 foiz
- Fransiya – 113 foiz
- Belgiya – 104,7 foiz
- Ispaniya – 101,8 foiz
Umuman olganda, Yevropa Ittifoqining 12 mamlakatida davlat qarzi YaIMning 60 foizidan oshgan.
2024-yilda byudjet taqchilligi bo‘yicha ham salbiy ko‘rsatkichlar kuzatildi. Ittifoq bo‘yicha o‘rtacha taqchillik YaIMning 3,2 foizini tashkil etgan (2023-yilda – 3,5 foiz). Eng yuqori taqchillik quyidagi mamlakatlarda qayd etilgan:
- Ruminiya – 9,3 foiz
- Polsha – 6,6 foiz
- Fransiya – 5,8 foiz
- Slovakiya – 5,3 foiz
Yil yakunida Yevropa Ittifoqining yalpi ichki mahsuloti 17,95 trillion yevroga (+4,3 foiz) yetgan bo‘lsa, umumiy byudjet taqchilligi 568 milliard yevro (-4,6 foiz) va davlat qarzi esa 14,544 trillion yevroga (+4,6 foiz) oshdi.
