AQSh 18 davlat bilan savdo kelishuvlariga intilmoqda
Kanada, Meksika va Xitoy AQShning savdo ro'yxatidan chiqarildi.
AQSh prezidenti Donald Tramp ma'muriyati 18 ta yirik hamkor davlat bilan savdo muzokaralarini olib borish uchun yagona asos ishlab chiqdi.
Yangi yondashuvdan ko‘zlangan maqsad — 8-iyulga qadar import bo‘yicha o‘zaro bojxona to‘lovlari masalasida muzokaralarni soddalashtirish va kelishuvlarga erishish. AQSh savdo vakili idorasi tomonidan tayyorlangan reja tariflar va kvotalar, tarifsiz savdo cheklovlari, raqamli savdo, tovarlarning kelib chiqish qoidalari va iqtisodiy xavfsizlik kabi sohalarni qamrab oladi.
Muzokaralar kelasi ikki oy davomida bosqichma-bosqich (har haftada oltita davlat bilan) o‘tkazilishi rejalashtirilgan.
Biroq, Kanada, Meksika va Xitoy ushbu 18 davlat qatoriga kiritilmagani ta’kidlandi. Kanada va Meksikadan olib kiriladigan tovarlarga alohida 20 foizlik boj joriy qilingan, Xitoydan import qilinadigan bojlar esa Tramp ma'muriyatining so‘nggi choralaridan so‘ng 145 foizgacha ko‘tarilgan.
Eslatib o‘tamiz, 2-aprel kuni AQSh prezidenti dunyoning 185 ta davlati va hududi mahsulotlariga bojxona to‘lovlari joriy etilishini ma'lum qilgan edi. Ular orasida Ozarbayjon ham bor. Ozarbayjon mahsulotlari uchun kamida 10 foizlik bojxona to‘lovi belgilandi. 5-apreldan universal tariflar, 9-apreldan esa individual tariflar kuchga kirdi. Shu bilan birga, Tramp bir qator davlatlarga nisbatan import tariflarini 90 kun muddatga kechiktirishga qaror qilgan.
