Istanbulda halokatli zilzila xavfi oshmoqda
Seysmologlar Istanbul uchun ogohlantirish berdi.
Istanbul halokatli zilzila bilan muqarrar ravishda yuzma-yuz turibdi. Bu haqda Istanbul munitsipalitetining zilzila masalalari bo‘yicha olimlar kengashi a’zosi, seysmologiya professori Xaluk Eyido‘g‘on ma’lum qildi.
Professorning ta’kidlashicha, Marmara mintaqasi tarixan halokatli zilzilalar sodir bo‘lib kelgan hududlardan biridir. Buni Vizantiya imperiyasining tarixiy arxivlari ham tasdiqlaydi.
Eyido‘g‘on so‘nggi vaqtlarda OAVda tarqalgan, “yengil zilzilalar kuchli zilzilaning yaqinlashayotganidan dalolat beradi” degan xabarlarni ilmiy asosga ega emasligini bildirdi. U: “Mintaqaning seysmik tarixidan xabardor bo‘lgan har bir kishi ertami-kechmi Marmara hududida kuchli zilzila bo‘lishini biladi. Biz, olimlar, bu xavf haqida anchadan beri ogohlantirib kelamiz”- deydi.
Mutaxassis, shuningdek, kuchli zilzila 40–50 yil ichida sodir bo‘lishi mumkinligi haqidagi taxminlarni ham noto‘g‘ri deb atadi. Uning aytishicha, seysmologlar faqat ehtimollarni hisoblashlari mumkin, ammo aniq sanani aytish ilmiy jihatdan imkonsiz.
“Marmara dengizida kuchli zilzila yuz berishi xavfi, shubhasiz, juda yuqori”, — deya xulosa qildi Eyido‘g‘on.
Eslatib o‘tamiz, 23-aprel kuni Istanbulda ketma-ket zilzilalar ro‘y berdi. Eng kuchlisi 6,2 magnitudada qayd etilgan bo‘lib, natijada 150 dan ortiq odam jarohatlangan, bitta uch qavatli bino butunlay qulagan. Zilziladan keyin kamida 50 ta yer silkinishi qayd etilgan.
