Yaponiyada chaqmoqqa qarshi maxsus dron yaratildi
Chaqmoq har yili 700 milliondan 1,4 milliard dollargacha zarar yetkazadi.
Yaponiyaning NTT kompaniyasi chaqmoqni o‘ziga tortib, energiyani xavfsiz tarzda yerga yetkazib beradigan dron ishlab chiqdi. Ular bu texnologiyani tabiiy chaqmoqdan keladigan zararlarning oldini olish uchun yaratishdi.
2024-yil dekabr va 2025-yil yanvar oylarida o‘tkazilgan sinovlarda, maxsus himoya qafasiga ega dron momaqaldiroq vaqtida 300 metr balandlikka ko‘tarilib, chaqmoq urishini qasddan o‘ziga tortdi. Tajriba davomida dron va yer orasidagi kuchlanish 2000 voltdan oshgani tasdiqlandi. Chaqmoq zarbasi kuchli ovoz va yorug‘lik tarqatdi, qafasning bir qismi erib ketdi, lekin dron baribir uchishni davom ettirdi.
Buning siri – dron atrofidagi maxsus qafasda. U chaqmoqdan keladigan katta elektr oqimini ichki qismlardan chetlab o‘tkazadi va zarar yetkazilishining oldini oladi. Qafas shuningdek magnit maydon va elektromagnit shovqinlarni kamaytiradi. Yaxshi tomoni shundaki, bu himoya tizimini mavjud dronlarga ham o‘rnatish mumkin.
NTT kelajakda bunday dronlar jamoalari shaharlarda bo‘ron vaqtida uchib, chaqmoq zarbasini muhim infratuzilmadan burib yuborishini xohlaydi. Chunki Yaponiyada chaqmoq har yili 700 milliondan 1,4 milliard dollargacha zarar yetkazadi. NTT bu texnologiya bilan shaharlarni va infratuzilmani chaqmoqdan to‘liq himoya qilishga umid qilmoqda.
