AQSh Ukraina kiberxavfsizlik loyihalarini moliyalashtirishni qisqartirdi
USAID mablag‘lari qisqargach, Ukraina kiberhimoyasi zaiflashmoqda.
AQSh Ukrainaga kiberxavfsizlik sohasida ko‘rsatib kelayotgan yordamni sezilarli darajada qisqartirdi. Ma’lumotlarga ko‘ra, kiberxavfsizlik sohasida faoliyat yuritayotgan o‘nlab ukrainalik va amerikalik mutaxassislar bilan tuzilgan shartnomalar bekor qilingan yoki to‘xtatib qo‘yilgan.
Bu o‘zgarishlar, asosan, Ukraina kiberhujumlardan himoya qilish loyihalarini moliyalashtirib kelgan AQSh Xalqaro taraqqiyot agentligi (USAID) faoliyatiga ajratilgan mablag‘larning qisqartirilishi bilan bog‘liq.
Manbalarga ko‘ra, shuningdek, Ukraina infratuzilmasini himoya qilish uchun mo‘ljallangan kompyuter uskunalari va dasturiy ta’minotlarning rejalashtirilgan yetkazib berilishi ham amalga oshirilmagan.
Vashington mablag‘lari Kiyev uchun kiberxavfsizlik sohasidagi asosiy moliyaviy manba hisoblangan. Oxirgi besh yil davomida USAID bu yo‘nalishga 200 million dollardan ortiq mablag‘ ajratgan.
Eslatib o‘tamiz, fevral oyida Donald Tramp ma’muriyati USAID shartnomalarining 90 foizini bekor qilish niyatida ekanligini e’lon qilgan edi. Natijada, Qo‘shma Shtatlarning global miqyosdagi yordam ko‘lamini 60 milliard dollarga qisqartirish rejalashtirilgan. Mart oyida esa Davlat kotibi Marko Rubio USAID dasturlarining 83 foizi yopilishini rasman ma’lum qilgan.
