HAMAS G‘azo uchun sulh taklifini ko‘rib chiqmoqda
Isroil bilan ko‘p yillik sulhga tayyor, biroq qurolsizlanishga rozi emas.
HAMAS G‘azo sektorida Isroil bilan 5–7 yil muddatga sulh tuzishga tayyorligini bildirdi, biroq qurolsizlanish talabini rad etdi. Bu haqda Qohirada vositachilar bilan olib borilgan muzokaralar chog‘ida HAMAS rahbariyatining OAV maslahatchisi Tohir Al-Nono ma’lum qildi.
“Biz o‘t ochishni to‘xtatish g‘oyasini yoki uning muddatini rad etmaymiz va bu masalani muzokaralar doirasida muhokama qilishga tayyormiz. Urushni tugatish bo‘yicha har qanday jiddiy takliflarga ochiqmiz”, — dedi Al-Nono.
HAMAS vositachilarning o‘z takliflarini qo‘llab-quvvatlashiga umid qilmoqda. Ular orasida janglarni to‘xtatish, G‘azo sektorini qayta tiklash, falastinlik asirlar va barcha garovga olinganlarni ozod qilish masalalari mavjud.
Biroq Isroilning G‘azo sektorini demilitarizatsiya qilish talabi qat’iy rad etildi.
“Qarshilik qurollari muzokara mavzusi emas. Ishg‘ol mavjud ekan, biz o‘z qurollarimizni saqlab qolamiz”, — deya qo‘shimcha qildi Al-Nono.
