Shimoliy Koreya va Rossiya o‘rtasidagi harbiy hamkorlik kuchaymoqda
KXDR Rossiyadagi harbiy operatsiyalarda ishtirokini tasdiqladi.
Shimoliy Koreya (KXDR) o‘z harbiylari Rossiyaning Ukraina bilan urushi davomida jangovar harakatlarda ishtirok etayotganini rasman tasdiqladi.
Bu haqda Yonhap agentligi KXDRning rasmiy axborot manbasi — Koreya Markaziy telegraf agentligiga tayanib xabar bermoqda.
Qayd etilishicha, Shimoliy Koreya askarlari KXDR yetakchisi Kim Chen In buyrug‘i asosida va ikki davlat o‘rtasida tuzilgan har tomonlama strategik hamkorlik shartnomasiga binoan Rossiyaga yuborilgan. Rasmiy ma’lumotda ta’kidlanishicha, ularning vazifasi “Ukrainaning Rossiya hududiga tajovuzkor bostirib kirishining oldini olish” va “Kursk viloyatini ozod etish bo‘yicha harbiy operatsiyani muvaffaqiyatli yakunlash”dan iborat bo‘lgan.
Shuningdek, 26-aprel kuni Rossiya Bosh shtabi rahbari Valeriy Gerasimov prezident Vladimir Putinga bergan hisobotida, Shimoliy Koreya harbiylari Kursk viloyatini ozod qilish operatsiyasida sezilarli yordam ko‘rsatganini ta’kidladi. Gerasimovning bu bayonoti KXDR qurolli kuchlarining Rossiyaga yuborilgani haqidagi birinchi rasmiy tasdiq bo‘ldi.
Mutaxassislarning fikricha, bu kabi hamkorlik xalqaro munosabatlarda yangi geosiyosiy keskinliklarni yuzaga keltirishi mumkin.
