Afg‘onistonda bir gramm oltin narxi 100 dollarga yetdi
Mamlakatda to‘y marosimlari uchun oltin olish tobora qiyinlashmoqda.
Afg‘onistonning Mozori Sharif shahrida arab oltinining bir gramm narxi 100 AQSH dollariga ko‘tarildi. Mahalliy aholining so‘zlariga ko‘ra, iqtisodiy qiyinchiliklar sababli to‘y va unashtirish marosimlari uchun oltin xarid qilish tobora mushkullashmoqda. Aholi oltin narxi tushishiga umid bildirmoqda.
Mozori Sharifdagi oltin sotuvchilarning aytishicha, oltin narxining oshishi jahon bozorlaridagi o‘zgarishlar, xususan, Xitoy va AQSH o‘rtasidagi iqtisodiy taranglik bilan bog‘liq. Savdogarlar ayollar orasida oltin sotish hollari ko‘payganini, sotib olish esa kamayganini ta’kidlashmoqda.
Hozirda shaharda 18 karatli oltinning bir gramm narxi 6 300 afg‘oniy, 21 karatli oltin 7 300 afg‘oniy, Eron oltini esa 4 400 afg‘oniydan sotilmoqda. Savdogarlar oltin bozoridagi harakat susayganidan shikoyat qilmoqda.
